Chapter 85
Sa pagdating ni Dodong at Maliya sa bungad ay agad nilang nasilayan ang tatlong asbo na nasa anyong aso na natutulog sa ilalim ng lilim ng malaking pat*y na puno. Napahinto si Dodong at awtomatikong nagpatiuna habang itinatago sa likuran niya si Maliya.
"Diyan ka lang Maliya! Papalubog na ang araw at siguradong maya-maya lang ay magigising na sila." wika ni Dodong.
Napatingin naman si Maliya sa mga ito habang napapa-isip. "Hindi pa ba tayo papasok?"
"Hindi pa, kaunting minuto pa, saka tayo papasok!"
Makaraan ang ilang minuto, saktong bumababa na ang araw sa kalupaan ay humakbang si Dodong papalapit. Isang angil ang kumawala sa pagitan ng bunganga ng tatlong asbo at napangisi si Dodong. Iyon kasi ang inaabangan niya ang paggising ng mga bantay. Kailangan kasi nilang gumawa ng kaguluhan upang malayang makababa sina Esmeralda mula sa itaas ng bundok. Magsisilbi silang pain ni Maliya, dalawang batang musmos na naligaw sa kuta ng mga aswang.
Agad na nagkunwaring takot si Dodong habang pinoprotektahan si Maliya. Si Maliya naman, tulad ng dati ay diretsong nakatingin lang sa mga nilalang, walang emosyon, walang kaba at walang takot na namumutawi sa pagkatao niya.
Nang tuluyan nang magising ang mga asbo ay sumigaw si Dodong, napasigaw na rin si Maliya at akmang tatakbo sila palayo nang mapalibutan sila ng mga ito.
"Aba, ano ito? Mga batang naliligaw." Isang aswang ang nakita nilang papalapit sa kanila, hindi ito katulad ng mga asbong nasa anyong aso, halatang isang malakas na uri ito ng aswang dahil nasa anyong tao pa rin ito.
"Saan ba ang tungo ninyo Otoy?" tanong nito at nagpalinga-linga si Dodong, tila naghahanap ng malulusutan. "O, bakit? hindi naman namin kayo sasaktan, ang totoo niyan, baka nga tulungan pa namin kayo na makauwi. Hindi naman nananakmal ang mga asong iyan, sadyang bantay sila sa aming munting pamayanan." paliwanag naman ng lalaki.
"Talaga?" inosenteng tanong ni Dodong. Nanatiling nakasunod ang mga mata niya sa mga asong nakapalibot sa kaniya. Pagbaling naman niya sa lalaki, isang ngiti ang sumilay sa mga labi nito.